Gi-'chaku' sa kagawad moreklamo

CEBU - Suspetsadong gipasakaan og kasong attempted rape mireklamong gibunalan ang iyang ulo og “nunchako” sa usa ka kagawad sa barangay nga maoy nidakop kaniya ug gipasagdan lang siyang gitabangan og kulata sa ilang mga silingan niadtong Domingo sa gabii sa barangay Bus-ogon lungsod sa San Remegio.

Ang suspetsadong si Edwin Flores, 35, kargador, dihang gikahinabi sa Banat News nagkanayon nga mosang-at siya’g kaso ngadto sa Ombudsman for the Visayas batok sa maong kagawad (ngan gipugngan sa Banat News).

Dugang sa iyang kasuhan mao ang ilang mga silingang miapil og kulata kaniya nga sila si Arnold Golesao, Rex Lopez, Roel Dadol ug Ceric Arnado.

Si Flores gi-turn-over sa maong kagawad ngadto sa kapulisan niadtong mga alas 8 pasado sa Domingo tungod sa pasangil nga misuway siya paglugos sa 12 -anyos nga silingang babaye.

Sumala pa sa sumbong misulod ang suspek sa lawak sa 12-anyos nga silingan ug gisuwayan kini og lugos ug gipanghinol ang pribadong parte sa lawas dungan sa pagsampong sa baba.

Apan ang dalagita nakasinggit pangayo og tabang hinungdan nga naalerto ang iyang mga kabanay ug nadakpan ang suspetsado nga miresulta sa pagpamun-og una pa siya dad-a ngadto sa kapolisan.

Gihimakak hinuon niini ang maong pasangil.

Si Flores napasakaan na og kaso niadtong miaging adlaw sa kasong attempted rape sa korte sa Bogo City.  (BANAT NEWS)