CEBU – Usa ka 20-anyos nga lalake kinsa giingong miyembro sa Alpa Kappa Rho (AKRHO) fraternity ang nabukbokan sa duha ka miyembro sa Tau Gamma Phi kagahapon sa kadlawon didto sa Barangay Poblacion, dakbayan sa Talisay.
Ang biktima giila sa mga polis nga si Inosencio Palmares Jr., taga Sitio Miramar, Barangay Poblacion kinsa nakaangkon og mga bun-og sa nagkalainlaing bahin sa lawas.
Samtang ang mga suspetsado giila lang sa ngalang “Raymund”, 26, taga Poblacion, ug “Glenn Buldog”, 19, taga Barangay Cansojong sa nahisgutang dakbayan, kinsa giingong pulos mga sakop sa Tau Gamma Phi.
Base sa imbestigasyon sa mga polis nga si Palmares kauban sa usa niya ka brother sa fraternity, naglakaw sa karsada dihang ang mga suspetsado kalit lang mitunga sa ilang luyo ug si Raymund kinsa nagbitbit og kutsilyo maoy misuway pagdunggab ngadto kang Palmares apan nakalikay ang naulahi.
Maoy hinungdan nga si Palmares ug ang kauban mikabad og dagan ug nagkatibwaag sila apan gidimalas si Palmares kay naapsan kini sa mga suspetsado ug maoy gitabangan og kulata. – BANAT NEWS