Mokabat sa P300 mil ang gahing gihatag ni 6th District Congresswoman Nerissa Soon-Ruiz alang sa livelihood project sa mga sakop sa Muslim community sa barangay Mantuyong dakbayan sa Mandaue atol sa pagtapos sa Ramadhan.
Si Ruiz mitambong sa kalihukan sa pagtapos sa Ramadhan diha sa maong barangay nangpod-apod og tag lima ka kilong bugas sa 130 ka mga pamilyang Muslim sa maong barangay.
Si Sakiran Hajan, Director sa Office of the Muslim Affairs kon (OMA) gipasaligan ni Ruiz nga bisan unsang orasa makuha na niini sa iyang buhatan ang maong pundo aron magamit sa livelihood projects sa mga Muslim sa maong barangay.
Gawas sa maong gahin, plano ni Ruiz nga mahatagan og short term skills sama sa welding, plumbing, bar tending ug uban pang mga kursong in-demand sa gawas sa nasud ang mga buot mokuha niini.
Matud pa ni Ruiz, ang buot mokuha sa maong kurso mopadangat lang ngadto sa TESDA ug magpa-enroll gumikan kay aduna nay daang gahin nga usa ka milyon ka pesos alang sa mga tinun-an nga mokuha sa maong kurso.
Gikalipay hinuon sa Muslim community ang maong gasa gikan sa kongresista, matud pang Hajan giisip kini nilang dakong gasa ngadto kanila sa pagtapos sa Ramadan.
Agi og bawos, mipasalig ang mga lider sa maong pundok nga motabang sa kahapsay ug kalinaw sa dakbayan sa Mandaue.
Ang maong panagtigum gitambungan kini ni Mandaue City Vice Mayor Carlo Pontico Fortuna, Konsehal Emil Rosal ug Kon. Noyleen Borbajo diin lakip usab sa mitambong mao ang presidente sa Muslim Community sa Mantuyong nga si Hadji Najib Andang.