Dutchman gipusil sa ugangan

CEBU - Kritikal ang kahimtang sa usa ka Dutchman sulod sa Intensive Care Units (ICU) sa South General Hospital human gipusil ug gidunggab sa iyang ugangan niadtong Domingo sa alas 7:00 sa gabii diha sa ilang panimalay sa barangay Sumaguan, lungsod sa Argao.

Kini human dapati sa biktima ang suspek tungod sa pagtamparos sa naulahi sa 3-anyos niining apo nga anak sa maong langyaw.

Ang biktima giila nga si Dennis Van Westerop, 38, kapikas sa anak sa suspek ug nagpuyo sa nahisgutang lugar kinsa nakaangkon og samad pinusilan sa tuong abaga, tuong bukton, tuong batiis, buko-buko ug mga samad dinunggaban sa lusong-lusong ug tuong bahin sa lawas.

Samtang gipangita pa sa kapolisan ang suspek nga ugangan niini nga si Victoriano Gomez Jr. “alias Junior Gomez.”

Base sa report sa Argao Police Station, ang asawa sa biktima nga si Gladys Gomez Westerop niasoy sa kapulisan nga mga alas 4:00 sa hapon niadtong Domingo nangabot sila sa ilang pinuy-anan uban sa iyang bana (biktima) ug 3-anyos nilang anak gikan sa dakbayan sa Sugbu.

Matud pa ni Gladys gitawag sa iyang amahan ang ilang anak apan gikatahong wala moduol ang bata hinungdan nga giusban kini og sangpit sa suspek ug ning tungura nipatuo na ang bata ug miduol sa apohan.

Apan sa pagduol sa bata gikatahong kalit nga gitamparos sa suspek ang apo hinungdan nga mihilak og maayo ang bata.

Ang biktimang si Westerop kinsa didto na sa ikaduhang andana sa ilang panimalay nakadungog sa tiyabaw sa anak daling nanaog ug nakisayod sa nahitabo.

Tungod niini giduol sa biktima ang ugangan ug diha-diha gisukmag ang nawong sa suspek hinungdan nga nahayang kini ug gibiyaan sa biktima kinsa midiretso og gawas sa balay ug wala dayon mobalik.

Ang suspek tungod sa kasuko misulod sa balay ug mikuha og armas ug sundang ug gipangita ang biktima.

Matud pa ni Gladys nianang pagka-alas 7:00 pasado sa gabii nakadungog nalang siya’g tulo ka mga sipang buto-buto sa armas diha sa gawas sa ilang panimalay.

Pipila ka gutlo ang nakalabay dunay nitawag sa inahan ni Gladys nga si Clara Gomez nga nagpahibalong gipusil sa bana niini ang bana sa ilang anak.

Si PO1 Bernie Lao desk Officer sa Argao Police nga gikahinabi sa Banat News nagkanayon nga kagahapon sa hapon pabilin pang nasulod sa ICU sa South General Hospital ang biktima.

Gihikay na sa kapolisan ang tukmang kasong posibleng ipasaka batok sa suspek apan paabuton pa nila ang asawa sa biktima ug kabahin sa kaso. – BANAT NEWS