Giluba og screw driver

CEBU - Nasabak sa dughan ang usa ka panday dihang gidunggab kini og screw driver  sa iyang kaubang panday sa alas 3:30 sa kadlawon kagahapon diha sa may Gil Garcia St., barangay Capitol Site ning dakbayan.

Ang nagpaalim sa samad sa dughan sa Cebu City Medical Center (CCMC) giila sa kapulisan nga si Martiniano Tolome, 52, stay-in sa gipanday nilang balay sa Capitol site, ug taga Consolacion.

Ang midunggab sa biktima mao si Richard Minoza, hingkod, nga  taga dakbayan sa Carcar.

Sa imbestigasyon nila ni SPO1 Rogelio Nedamo ug mga kaubanan sa Homicide Section sa Cebu City Police Office nasayran nga nagkalalis ang biktima ug ang suspetsado dihang nahiabot ang suspek sa ilang bunkhouse nga lasbag kaayo.

.Dihang miinit na ang lalis, usa sa duha ka kauban sa suspek nga wala hiilhi, miatake og kinumo sa biktima, samtang ang suspetsadong si Minoza milanit sa gitangkil niining screw driver ug giduslak ang biktima sa dughan.

Human sa pagpanunggab misibat dayon ang suspetsado ug ang iyang duha ka kauban samtang ang biktima gidali usab pagdala sa tambalanan. (BANAT NEWS)