CEBU - Naangol ang usa ka drayber sa taxi dihang gipusil kini sa nag-inusarang tulisan didto sa dalan A.C. Cortes Avenue sa barangay Cambaro, dakbayan sa Mandaue alas 12:00 pasado sa miaging gabii.
Ang biktima mao si Alberto Aranquel, 33, minyo, nga taga sitio Suba-Masulog, barangay Basak, dakbayan sa Lapulapu ug drayber sa Peace Taxi nga nagdala sa plate number GXV 339.
Si PO3 Gregorio Cabesares sa Mandaue City Police Station nga nahinabi sa Banat News miingon nga nagpaingon sa dakbayan sa Lapulapu ang biktima dihang gipara kini sa wala hiilhing lalake nga nagpakaaron-ingnong pasahero.
Apan dihang miabli na kini sa pultahan, imbis molingkod, milanit na hinuon sa iyang armas de fuego ug gition ngadto sa biktima uban sa pahibawo nga tulis.
Gumikan sa kakurat sa biktima, gidali pag-abli niini ang iyang kahon nga sudlanan sa kuwarta apan gumikan malagmit sa pagtuo sa tulisan nga armas ang kuhaon sa biktima, gipusil kini sa dughan.
Ang tulisan kinsa nahadlok usab nga hidakpan misutoy og lakaw paingon ngadto sa suok nga bahin sa Cambaro nga wala makadala og kuwarta.
Samtang ang biktimang samaran nakapangayo og panabang sa ubang mga drayber sa taxi nga maoy mihatod kaniya ngadto sa Mandaue City District Hospital.
Sumala ni PO3 Cabesares nga gihimo dayon nila ang hot pursuit operation apan napakyas sila sa pagsikop sa tulisan. (BANAT)