CEBU - Kritikal ang kahimtang sa usa ka 5-anyos nga batang babaye human kini madasmagi og motorsiklo paglabang niini sa karsada sa barangay Campusong lungsod sa Borbon niadtong Lunes sa alas 7:00 sa gabii. Ang biktima mao si Clarisse Salogaol, 5-anyos ug molupyo sa nahisgutang lugar samtang ang drayber sa Honda wave nga motorsiklo nga nakadasmag kaniya mao si Nestor Armero, 25, taga Intermedia barangay Poblacion Borbon.
Matud ni PO3 Edgar Novabos sa Borbon Police dihang nahinabi sa Banat News gikan sa lungsod sa Sogod si Armero ug paingon mopauli sa barangay Poblacion niadtong higayuna.
Apan paghiabot niini sa nahisgutang lugar wala niini mabantayi ang bata kinsa giingong kalit lang nitabok sa karsada hinungdan nga nadasmagan gyud niini ang biktima ug nalamba sa aspaltadong karsada.
Daling gidala ang biktima sa Juan Dosado Hospital sa lungsod sa Sogod apan tungod sa seryosong kahimtang gi-refer sa mga doktor sa Vicente Sotto Memorial Medical Center (VSMMC).
Samtang ang drayber sa motorsiklo nga nakadasmag boluntaryo usab dayun kining nitahan sa kapulisan ug nagpaabot sa tukmang sumbong nga ipasaka batok niya. (BANAT)