Dili motugot si Mayor Tomas Osmeña sa sugyot sa mga tagdumala sa Cebu City Medical Center (CCMC) kabahin sa plano nilang pagkolekta og dugang bayranan sa serbisyo nila sa mga pasyente.
Ang CCMC consultant nga si Doctor Rodolfo Bigornia ingon man ang acting hospital director nga si Doctor Myrna Go nagtinguha nga mokolekta og dugang bayranan sa ubang serbisyo niini ngadto sa ilang mga pasyente.
Buot usab nilang magpabayad sa serbisyong kaniadto libre partikular na niini ang mga pasyente nga madala sa emergency room ingon man sa out-patient department.
Tumong sa tagdumala sa maong tambalanan nga magamit ang pundo nga makolekta sa pagpalambo sa serbisyo sa CCMC.
Apan dili pabor si Osmeña sa nahisgutang lakang tungod kay kini giingong nasukwahi na sa tumong sa usa ka lokal nga kagamhanan.
Kini ilabi na nga dili malimod nga dunay ubay-ubay nga mga pasyente nga kabus ug walay ikabayad sa tambalanan.
Ang gusto nga mahitabo sa mayor nga dunay mapakita nga maayong serbisyo ang mga personnel diha sa city hospital.
Sa pikas bahin, walay plano usab si Osmeña nga i-renoate o ayuhon ug paninduton ang nahisgutang tambalanan bisan pa man nasayran na sa mayor nga gubaon na ang pipila ka bahin sa CCMC.
Matud sa mayor nga siya walay plano sa pagpatukod og bag-ong building sa city hospital kung ang mga personnel lang gihapon niini ang modumala.
Makapila na balik-balika sa mayor nga wala nay paglaum nga molambo pa ang serbisyo diha sa nahisgutang tambalanan maong nakadesider kining ibaligya na lang ang city hospital.
Ang kaubos lang unya sa presyo sa pagpalit sa CCMC maoy nakita sa mayor nga makapugong sa iyang tinguhang pagbaligya niini.
Matud ni Osmeña nga siya mokuha sa serbisyo sa usa ka appraisal company aron maoy pabana-banaon kung pilay halinon sa maong tambalanan.