CEBU – Patay ang usa ka tawong nakatulog sa kahubog human kini dunggaba og pinute sa iyang kainom didto sa barangay Mainit, siyudad sa Naga niadtong Martes sa alas 7:00 sa gabii.
Ang biktima mao si Domer Diaz, 25, ulitawo nga taga Mainit, samtang ang suspek mao si Isaias Capablanca alyas “Dodo,” 23, ulitawo, ug silingan ra usab sa biktima.
Giduslak sa bukobuko ang biktima ug ang pinute milapos sa iyang tinae nga maoy hinungdan sa hinanali niyang kamatayon.
Si PO3 Edwin Yngayo sa Naga City Police Station mibutyag sa Banat News nga sa sayo pa nag-inom ang biktima ug ang suspek kauban si Joel Capablanca nga paryente sa suspek.
Pagkahuman sa ilang inom mipauli ang suspek ug nagpabilin ang biktima nga nagbuy-od sa lantay kay nahinanok pag-ayo gumikan sa kahubog.
Apan giingong gibalikan kini sa suspek nga nagdala na og pinute ug sa walay daghang langas, gidunggab ang nag-ubo nga biktima sa iyang bukobuko nga milapos sa tiyan niini.
Gibanabana ni PO3 Yngayo nga may 24 pulgadas ang gitas-on sa pinute nga gigamit pagdunggab sa suspek ngadto sa biktima.
Ang kapulisan padayon pa sa ilang imbistigasyon sa maong hitabo samtang nagpabilin pa usab nga wala hidakpi ang suspek hangtod ning higayona.