Nasakpang Gipatungan og Lain

CEBU - Usa ka construction worker niunay og dunggab sa iyang kapuyo human giingong iyaha kining nasakpang hubo ang lawas ug gipatungan ug nakighilawas sa usa ka naghubo usab nga lalaki diha sa usa ka hilit nga dapit sa sitio Langub sa barangay Kalunasan ning dakbayan sa Sugbu kagahapon sa tungang gabii.

Ang suspek nadakpan dayon sa mga tanod pinanguluhan ni Ariel Ybareta samtang nagbitbit pa kini og kutsilyo ug gi-turn-over sa Guadalupe Police Station.

Ang suspek nagpangidaron og 44-anyos, usa ka construction worker, pangan ug apelyedo gipugngan sa Banat News samtang ang biktima nga 43-anyos gitago usab ang tinuod nga bansagon anaa mahilandig sa Cebu City Medical Center (CCMC) human mahiagum og samad dinunggaban diha sa liog.

Sa imbestigasyon ni PO3 Teodoro Lumanas sa Guadalupe Police Station ang biktima mitug-an nga nasuko kaniya ang suspek sa walay igong hinungdan ug nakainom kini niadtong tungora.

Dugang pahayag sa biktima gikulata siya sa suspek ug di pa paigo mikuha kini og kutsilyo ug dayong dunggab kaniya.

Apan ang suspek nga nahinabi sa Banat News niasoy nga nianang hapon niadtong Biyernes gikan siya sa trabahoan diha sa Kalunasan iyang giadto ang kapuyo (biktima) sa balay sa igsuon niining babaye diha sa Guadalajara.

Iyang naabtan nga nag-inom ang biktima uban sa mga higala ug igsuon niini maong niapil siya sa grupo ug dihang nakauli na sila nagtiwas nasad sila og inom sa mga silingan.

Matud sa suspek dangtan og 30 minutos gikan sa ilang paghiabot kalit lang nawagtang iyang kapuyo maong iya kining gipangita sa pagtuong niuli na sa ilang balay.

Apan samtang siya naglakaw dihay habal-habal nga nagpaingon ug iyang nakit-an sa daplin sa dalan iyang kapuyo (biktima) pinaagi sa suga sa motorsiklo nga hubo ang tibuok lawas ug dihay nagpatong nga wala niya mailhing lalaki tungod sa kangitngit sa lugar.

Matud pa sa suspek nadunggan pa niya ang kapuyo nga miingon sa lalaki nga pagbantay kay nagpadulong siya ug daling mibarog ang lalaki ug midagan.

Inay iyang gukdon iyaha nalang gisapwang ang kapuyo (biktima) apan gidunggab na hinuon siya niini hinungdan sa samad sa iyang walang bukton.

Matud sa suspek nga nakiglayog siya hangtud iyang nailog ang kutsilyo apan siya mihimakak nga iyang gidunggab og tuyo ang biktima.

“Wala nakoy kalibotan sir basta wala nako dunggaba siya, katong iyang bun-og siguro paglinayogay to namo kay dako mana siya (biktima),” asoy pa sa suspek.

Matud sa suspek iyang gibiyaan ang biktima aron mangayo og tabang sa mga residente sa dapit apan sa iyang pagbalik gidala na kini ngadto sa CCMC.

Nakuha usab sa mga tanod ang nagkadugong sapot sa biktima lakip na underwear niini. – BANAT