3 ka C-130 crew ilubong karong adlawa

CEBU – Ilubong na karong adlawa ang tulo ka mga sakop sa Philippine Air Force nga naapil sa pagkahagsa sa C-130 cargo plane sa Samal Island sa Davao sa milabay’ng bulan.

Miabot na usab kagahapon ang patayng lawas ni SSgt. John Areola dinhi sa Sugbu uban sa mga kabanay niini gikan sa lalawigan sa Pangasinan.

Sumala pa ni  Capt. Ramil Daet sa PIO sa 220th Airlift Wing sa pakighinabi sa Banat News nga tulo ka mga crew niini ang ilubong karong adlawa sa Mactan Memorial Gardens sa Marigondon.

Ang ilubong mao sila si TSgt. Constatino Lobrigas, SSgt. Aldrin Illustrisimo ug SSgt. Felix Pedro Patriarca diin gikan sa ilang panimalay dad-on sa maong sam-ang ug misahan sa Base Chaplain nga si Fr. Adan Rose.

Samtang si SSgt. Petronilo Fernandez didto kini ilubong sa lungsod sa Liloan, si Capt. Adrian de Dios ang co-pilot sa C-130 gidala na usab ngadto sa ilang dapit sa Catarman, lalawigan sa Samar ug laing duha pa nila ka kauban ang nalubong na usab kagahapon.

Si Maj. Manuel Zambrano gilubong sa milabay’ng adlaw sa Libingan ng mga Bayani sa Fort Bonifacio samtang si SSgt. Gary Diñoso gilubong na usab ngadto sa Mactan Memorial Gardens sa Marigondon dakbayan sa Lapulapu.

Samtang kagahapon gihatud sa usa ka PAF Fokker Plane ang patay’ng lawas usab ni SSGT. Areola nga gihatud sa iyang mga ginikanan, sama sa mga kaubanan niini gisugat usab kini og “Hero’s Welcome” sa maong airbase pinanguluhan sa 220th AW pinanguluhan ni Col. Rolando Hautea.

 Ang biyuda ni Areola nga si Jacklyn Areola nagkanayon nga sakit man hunahunaon apan gidawat na niya ang nahitabo sa iyang bana hinungdan nga wala na kini magplano nga modangop ngadto sa NBI alang sa usa ka DNA testing.

Matud pa niya iyang    ipa-cremate ang lawas sa iyang bana karong Lunes sa Rolling Hills aron madala niya sa ilang panimalay ang abo niini ug kanunay nila kining makauban.