Maayong pagkalaksi sa walang bahin sa ulo sa usa ka delivery boy human kini bughaa ginamit ang pinuti sa wala hiilhing criminal sa miaging gabii didto sa F. Jaca St., barangay Inayawan ning dakbayan.
Ang nalandig sa Cebu City Medical Center (CCMC) giila sa kapolisan nga si Jeger Pepino, 25, ulitawo, nga taga Sitio Torre, Inayawan ug usa ka delivery boy sa bakery.
Sa imbestigasyon nila ni SPO2 Rey Cuyos ug mga kaubanan sa Homicide Section sa Cebu City Police Office, nasayran nga ang biktima, nagpalit lang og sigarilyo sa usa ka tindahan sa nahisgutang dapit.
Dihang kalit lang mibutho sa iyang luyo ang wala hiilhing tawo nga nagdala og pinuti ug sa walay daghang pangutana gibugha ang ulo sa biktima.
Ang tuyo sa maong kriminal mao unta ang pagbuak gyud sa bagolbagol sa biktima apan maayo kay nakalihay og dyutay ang naulahi hinungdan nga ang pikas bahin ra sa iyang ulo maoy nalaksi.
Pagtan-aw sa kriminal nga mitabisay na ang daghang dugo, mikaratel kini'g dagan ug gibiyaan ang biktima diha sa karsada.
Ang biktima gidali pagdala sa CCMC samtang padayong gipangita sa kapolisan ang mibugha kaniya.