Napulo ka mga tawo ang nangaangol human ang ilang gisakyang multicab nahagbong sa pangpang nga may gilawmon nga kapin sa 50 ka tiil diha sa sitio Morga barangay Bonbon ning dakbayan sa Sugbu kagahapon sa alas 3:00 sa kaadlawon.
Ang mga nalandig sa Cebu City Medical Center (CCMC) kinsa nakaangkon og mga samad, pangos ug bali sa kalawasan naglangkob nila ni Carl Creus, 20, taga Sudlon II ning dakbayan drayber ug anak sa tag-iya sa multicab.
Si Creus gikatahong tua na karon sa tambalanan sa Mactan Benito Ebuen Hospital sa dakbayan sa Lapulapu kinsa nakaangkon og bali sa gusok human gipapalhin sa iyang amahang sakop air force diha sa maong tambalanan.
Samtang giila ang mga nangaangol niyang kauban nga sila si Princess Hernadez, 19, Arfe Baculi, 17, Analene Cabrera, 25, Nelan Cabiolo, 16, Welmar Raboyas 20, Arnold Montejo, 21, Geralyn Casenello, 16, Rofe Beliacora, 25, ug Marcelina Tabaras, 43, pulos managsilingan sa Sudlon II apan adunay laing duha nga wala mailhi kinsa gikatahong ni- hitch ride lang kanila.
Si Erwin Jay Raboyas, 15 , nga usa sa mga pasahero ug naluwas human muambak sa sakyanan sa dayon nang kahagbong nga gikahinabi sa Banat News nagkanayon nga sila ug mga kaubanan gikan nanuroy sa pista sa usa sa mga lugar sa barangay Bonbon.
Giingong kusog kaayong nakapadagan si Carl niadtong tungura ug sa pag-abot sa may kurbadahon ug tungasong bahin sa sitio Morga nalimbuwad ang multicab ug nahagbong sa bakilid nga may gilawmon nga kapin sa 50 ka tiil.
Dali siyang nakaambak ug ang duha ka hitchhikers ug ilang gipahibalo sa kabalayan ang insidente hinungdan sa pagkaluwas sa ila nga mga kasakay.