Nalandig sa tambalanan ang usa ka tawo nga gidunggab sa buwang sa manok sulod sa videokihan sa lungsod sa Borbon, Cebu kagahapon sa alas 2:30 sa kaadlawon.
Ang biktima mao si Joseph Monroid, hingkod,nga taga sitio Montenegro, barangay Candaruhan, Borbon.
Gibukobuko pagdunggab ang biktima sa usa ka tawong nailhan lang nga Bongbong, lumad nga taga Bacolod City apan kasamtangang nagpuyo sa sitio Montenegro.
Si PO3 Owen Paticuang nga gikahinabi sa Banat News nagkanayon nga ang biktima ug ang suspetsado pulos na hubog nga nag-videoke sulod sa panimalay sa ilang higala nga si Adonis Damayo, uban sa ilang mga higala.
Apan dihang nalingaw na sila sa pagkanta-kanta nagkalalis ang duha ug dihang gilupig ang suspetsado, gikalitan og dunggab sa dala niyang buwang sa manok ang biktima.
Samtang gidala sa tambalanan ang biktima, misibat usab dayon ang suspetsado nga hangtod karon wala pa hidakpi.
Si PO3 Paticuang nagduda nga kanta gyud ang hinungdan sa maong hitabo apan wala lang niya mapiho kun dili ba “My way” nga kanta ang gilalisan sa duha.
Nasayran nga basta away sulod sa videokihan, kasagarang hinungdan niini, kanta gyud, matud ni PO2 Paticuang.