Nagkaguliyang ang mga molupyo sa dalan Palma, barangay San Roque ning syudad dihang nakita nila ang usa ka hinilog nga bata nga naglutaw patay sa esteros diha sa maong lugar niadtong miaging buntag.
Ang maong “fetus” nga lalake, gibanabanang may upat ngadto sa lima ka buwan.
Sa imbestigasyon sa Homicide Section sa Cebu City Police Office usa ka Michael Rosales, miangkon nga siyay mialsa sa maong fetus gikan sa tubig sa kanal ug gisumbong kini ngadto sa kapolisan.
Si Rosales miingon nga diha siya sa ilang pansayan dihang nadungog niya ang kaguliyang sa iyang mga silingan.
Dihadiha nakita niya ang fetus nga naglutaw sa tubig nga baho kaayo ug plywood maoy gigamit niya sa pag-alsa niini sa ibabaw.
Sa pagkakaron ang maong puya tua na sa usa sa mga punerarya ning dakbayan alang na sa pormal nga paghipos niini .