‘Pagdagit’ ni Joavan sa mag-agaw gisusi, apan biktima mihimakak

Wala pa mahilom ang mga kontrobersiya  nga gikalambigitan sa anak sa mayor sa dakbayan sa Talisay,  niining ulahi nalambigit na usab si Joavan Fernandez og laing kontrobersiya ug mihimo na og imbestigasyon ang kapolisan kabahin sa report nga “gidagit” niini ang duha ka babaye niadtong adlaw’ng Lunes sa hapon sa sitio San Miguel, barangay Linao, dakbayan sa Talisay.

Kini dihang usa ka Ivy Arañas Ouano, 26-anyos kawani sa city nga nadestino diha sa motorpool ug ang 15-anyos niining ig-agaw gikuha ni Joavan gikan sa ilang balay diha sa nahisgutang barangay.

Ang uyoan sa menor de edad nga konsehal sa barangay Linao nga si Wendell Caparida kinsa maoy guardian sa 15-anyos sa pakighinabi sa Banat News nagkanayon nga nananghid si Joavan kaniya nga kuyogon ang iyang pag-umangkon.

Miangkon hinuon kini nga gumikan sa nakit-ang nagbagal diha sa hawak sa anak sa mayor nisugot nalang siya pagsanong. Apan gibati siya og kabalaka tungod kay ang iyang pag-umangkon wala dayon mauli.

Nabalaka sad silang motaho sa kapolisan tungod kay masibya kini sa media nga posibleng ikasuko ni Joavan ug mameligro ang duha ka babaye. Ang hepe sa kapolisan, Supt. Romeo Perigo pagkadawat sa impormasyon mipadala kang PO2 Roelito Tano aron mopahigayon og imbestigasyon apan gikatahong mihangyo si Caparida nga hatagan una siya og igong panahon kay mangayo pa siya og pagtugot sa mga ginikanan sa iyang pag-umangkon.

Si Ouano ug ang ig-agaw niini ang gihatod ni Joavan sa balay niana nang Martes sa gabii diin nasigpatan sa mga nagbantay nga polis apan dali kining nisutoy padulong sa south coastal road hinungdan nga mialerto sila sa ilang mga kaubanan lakip na sa Cebu City Police Office.

Nibutang og checkpoint ang kapolisan apan nakaipsot kini.

Si Perigo uban kang PO3 Brenda Espina sa Women’s Desk ang miadto sa balay sa nahisgutang mga babaye niadtong Martes sa gabii aron makuhaan kini og pamahayag apan ang duha wala mokooperar sa polis ug matud sa duha nga mikuyog sila kang Joavan aron maglingaw-lingaw diha sa Canton Beach sa barangay Cansojong.

Si Gregorio dela Torre, tsirman sa FISECA  mibutyag nga si Joavan uban sa duha ka babaye ug laing usa ka lalaki ang mianha sa ilang buhatan niadtong Martes sa udto ug nananghid kining mogamit sa pumpboat tungod kay mangaligo kini uban sa iyang tulo ka kauban.