Nagtingkagol sa Talisay detention cell ang usa ka giingong asset sa army human gisumbong sa iyang asawa kabahin sa paghupot niini og armas nga walay lisensiya ug ang nahisgutang armas ang gitugyan sa maong asawa ngadto sa kapolisan sa dakbayan sa milabay’ng adlaw.
Ang suspetsado mao si Rick Abellanosa, residente sa barangay Dumlog, dakbayan sa Talisay ang gisikop nila ni PO3 Mikie Espina ug PO2 Allan Villazurda.
Si Abellanosa ang gitumbok sa iyang asawang si Girlie Misa nga naghupot og armas kalibre .45 nga pistola ug upat ka magazine niini, usa ka holster, usa ka posas, 30 ka buhing bala sa kalibre .45 ug 13 ka buhing bala sa kalibre .38 revolver nga walay dokumento.
Si Abellanosa mipakita og mission order # ADD 3H-209-0471 nga giluwatan ni Captain Agnes Bornea sa 33rd Military Intelligence Company apan ang maong mission order ang na-expire na niadtong Mayo 31, 2008.
Gumikan niini si Abellanosa gidala sa mga polis ug gibalhog sa detention cell ug mag-atubang og kasong illegal possession of firearms nga ipasaka sa kapolisan batok kaniya.