NPA supporters mitaha'g mga armas

Tulo ka high powered nga armas ang gisurender sa upat ka mga nangangkong supporters sa rebeldeng New Peoples Army (NPA) ngadto sa mga sakop sa 78th Infantry Battalion nga nakuha sulod sa managlahing special operations karun lang bulana.

Kagahapon sa buntag gipresentar ni Lt. General Pedro Ike Inserto, Commander sa Central Command ug Lt. Col. Raymundo Bañares, commanding officer sa 78th IB sila si Marcial Prieto, 70, taga sitio Inbentaryo, sa barangay Dungga siyudad sa Danao; Leon Manulat, molupyo sa sitio Canabag, barangay Bayabas, Danao City, Noel Agudo molupyo sa sitio Kawayan sa barangay Mag-antoy sa lungsod sa Tuburan ug Ruel Tañana, taga sitio Sili, barangay Bayabas, Danao City.

Sila misurender sa tulo ka US .30 caliber Springfield Rifles ug usa ka US M1 Carbine Rifle human gikatahong makumbinsir ug napasabot sa katuyoan sa gobiyerno alang sa kalinaw diha sa maong mga lugar.

Ang upat mitahan sa ilang mga armas human makadungog sa “Pulong-Pulong” sa mga sakop sa Special Operations Team sa 78th IB diha sa tagsa-tagsa nila ka mga barangay.

Usa sa upat ka mass supporters ang wala diha atol sa pagpresentar tungod sa gamay'ng kakulian apan ang tulo nga nidawat sa kwartang bayad sa matag armas nga gitahan miangkong sila supporters sa NPA kaniadto pa.

Si Prieto kinsa gikuyogan ni Dungga barangay Kapitan Ireneo Rom mitug-an sa mga tigbalita nga gibilin kaniya ang maong armas niadto pang 2002 sa usa ka giila lang niya sa pangalan nga Ka Ading, lider sa Front 2 Committee sa Komiteng Rehiyonal Sentral Bisayas sa NPA.

Apan hangtud karon wala na balika sa mga rebelde tungod usab sa grabeng operasyon sa military diha sa ilang dapit hinungdan nakahukom siyang isurender kini sa 78th IB ug di usab siya buot nga makontrahan sa militar.

Si Prieto kinsa may deperensya na sa pandungog gikatahong niangkon kang Rom nga kaniadto nakapakaon ug nagpatulog kini sa mga NPA diha sa iyang balay.

Ang upat nakadawat og tag P4,000 matag usa ka armas nga gitahan, apan sumala pang Inserto P2,000 ra ang bayad sa Balik Baril  Program sa susamang kalibre ug matang sa armas nga i-surrender apan iyaha kining gipatas-an pa og P2 mil aron mas daghan ang mosurrender og armas nga iya sa mga rebelde.

Matud pang Inserto ang AFP maoy bahala sa pagpatahan sa mga rebelde samtang ang mga lokal nga kagamhanan na usab ang bahala sa pangabuhian sa mga kanhi rebelde, kagahapon gidala ang upat ngadto sa buhatan ni Gov. Gwendolyn Garcia diin sila gisaaran og tabang pinansyal ug aron makabalik sa normal nga kinabuhi. Si Inserto miangkong hingpit na gyung napuhag ang kumunistang pundok sa tibuok lalawigan sa Sugbu apan dili usab siya makaingon nga wala nay armas nga gipanagoan ang mga supporters sa rebeldeng NPA.

Gitataw niya, nga malinawon na karun ang probinsya sa Sugbu, hinungdan ang mga langyaw’ng turista nipahimulos sa pagsuroy-suroy sa tibuok lalawigan.

Apan giangkon ni Inserto nga ang lalawigan sa Samar ug Negros lig-on pa gihapon ang NPA tungod sa kakabos sa mga tawo ug problemang agraryo. (Rey Pasaporte uban sa report ni Edwin Ian Melecio)