Polis nga nanukmag wala pa makalingkawas
Di pa hingpit nga makalingkawas sa imbestigasyon ang nakontrobersyal nga polis nga gipasanginlang nanukmag sa manag-amahan diha sa Ronda.
Matud ni Sr. Supt. Carmelo Valmoria, director sa Cebu Provincial Police Office, ang resulta sa awtopsiya sa NBI-7 sa patay’ng lawas sa tigulang lalaki nga si Donie Noel wala magpasabot nga si PO1 Christian Piñafiel di na mag-atubang og imbestigasyon.
Kun kahinumduman ang kabanay sa biktima nidangop sa NBI-7 aron adto nila kini ipa-awtopsiya ang patay'ng lawas sa namatay ug mitumaw nga dili ang pagsukmag ni PO1 Piñafiel ang namatyan sa tiguwang.
Gitataw ni Valmoria kinahanglan ipadayon gyud ang imbestigasyon batok kang Piñafiel ug ang resulta sa autopsy sa NBI gamiton isip ebidensya.
Si Piñafiel gipasanginlang hubog ug maoy nisukmag sa amahan nga si Donie ug anak niining si Russel niadtong Hulyo 25 sa gabii sulod sa police station sa Ronda.
Tungod niini, girelibuhan dayon siya ni Valmoria ug gidistino diha sa Provincial Security and Service Group sugod niadtong Agosto Uno samtang nag-atubang siya og imbestigasyon diha sa Provincial Investigation and Detective Management Branch (PIDMB) sa CPPO.
- Latest
- Trending
