Granada gipasanginlang ni-harass sa babayeng kawani

Kanhi mayor Demetrio Granada sa lungsod sa Tudela gireklamo sa usa ka kawani sa munisipyo sa nahisgutang lungsod og pagpang- harass kaniya ug nimandong pabakantehan ang giukopar niyang lawak sa karaang Municipal Building niadtong Huwebes sa alas 6:30 sa gabii.

Usa ka   Beatriz Pesquera, 75, nga retired public school teacher ug mao nay hepe sa Tourism Council sa nahisgutang lungsod ang ni-report sa kapulisan ug mipasangil nga siya gi-harass ni Granada uban sa iyang mga bodyguards.

Si Pesquera nialigar nga gisiyagitan siya niini ug gimanduan sa pagawas sa opisina niadtong niaging gabii ug gihulgang kung dili siya mogawas sa opisina sila maoy mo-pwersa kaniya sa pagpagawas sa Old Municipal Building.

Samtang si Insp. Ramon Villar ang hepe sa Tudela Police Station nitug-an sa Banat News nga si Pesquera nigawas nalang usab sa maong building aron sa paglikay sa kagubot.

Matud pa niini nga nahitabo gyud ang sininggitay sa isig ka kampo sa duha ka nag-ilog nga mayor niadtong tungora apan si Pesquera nigawas nalang samtang silang mga polis padayong nibantay sa mga lihok sa matag habig.

Hinuon si Granada ug mga supporters gikatahong pabiling niokupar hangtud ning mga higayuna diha sa Munisipyo.

Sumala pa niini nga sa iyang aninaw naapektuhan gayud ang public service sa munisipyo samtang sa ilang bahin wala sila magka-problema niini sa pagbantay sa kahapsay ug kalinaw.

Samtang si Mayor Rogelio Bacquerfo nga gikahinabi sa mga tigbalita kagahapong adlawa diha sa Provincial Police Office nibutyag nga nakurat nalang siya dihang iyang nadawat ang report sa iyang mga supporter.

 Matud pa niini nga nawad-an na sa iyang maayong panghuna-huna si  Granada hinungdan nga magpataka nalang kini sa pagpanghagis.

Sumala pa niini nga way authority si Granada sa pagmando sa mga tawo sa munisipyo tungod kay ang tibook lungsod nahibalo nga dili na kini mayor.

Gibutyag ni Mayor Baquerfo nga dunay grupong gikatahong nisuway unta’g rescue sa dinakpang si Arnold Montero suspetsado sa paglabay’g granada sa Police Station sa nahisgutang lungsud.

Apan kini gipanghimakak ni Villar gumikan kay dili kini tinuod sumala pa sa mga escorts ni Montero nga sila si PO1 Victor Moscoso ug PO1 Joey Deloso.