Nilabay'g granada sa Tudela gidakop

Suspek sa paglabay og granada sa Tudela police station sa milabay'ng buwan nadakpan sa kapolisan apan ang iyang pagkadakop way kalambigitan niini gumikan kay warrant of arrest sa kasong murder sa Ormoc City ang hinungdan sa iyang pagkadakop.

Ang kapolisan sa Tudela armado og warrant of arrest nga giisyu ni Judge Apolinario Buaya sa Ormoc, mironda ug misikop  kang Arnold Montero, 30, nga taga Puertobello sakop sa naasoy'ng lungsod.

Si Montero maoy suspek sa kasong pagpatay sa usa ka ginganlan lang og ‘Daisog’ sa Ormoc niadtong Mayo 22, 2006 ug igsuon usab siya ni Marlito Montero nga maoy gipasanginlang namusil sa batabata ni Mayor Rogelio Bacquerfo human sa pulong-pulong sa usa sa mga barangay sa Tudela  duha na ka bulan ang nakalabay.

Sa nasayran duha ka wala mailhing tawo nga nagsakay og motorsiklo ang nilabay og granada sa Tudela sa miaging buwan apan maisip nga gi-suwerte ang mga polis kay walay gikatahong nangaigo  niadtong higayona.

Si Arnold gidala kagahapon diha sa Cebu Provincial Police Office (CPPO) ug gi-detained sa Provincial Intelligence Branch (PIB) alang sa imbestigasyon.

Si Mayor Bacquerfo nibisita kagahapon sa buhatan ni Sr. Supt. Carmelo Valmoria ug nagkanayon nga miangkon na si Arnold Montero nga siya maoy naglabay og granada kuyog sila si Cris Algomedo ug Ricky Oliveros.

Apan si Valmoria nagkanayon nga dili pa siya makaingon nga mao na gyud si Montero ang suspek sa paglabay og granada sanglit wala pa silay witness nga magtumbok kaniya.

Gikatakdang dad-on si Montero didto sa Ormoc diin siya nag-atubang og kasong pagpatay.