Babaye nasakmitan mga gamit himuong dinamita

Nasikop sa kapolisan sa dakbayan sa Lapulapu ang usa ka babaye nga nagdala og mga sagol alang sa paghimo og dinamita sa milabay’ng hapon  didto sa Barangay Pajac, corner Bankal dakbayan sa Lapulapu.

Ang nasikop mao si Marilyn Bagiuo Babatuan, 33, minyo ug lumad sa  Barangay San Vicente, lungsod sa Cordova.

Base sa pamahayag ni PO3 Joseph Damasco, desk officer sa kapolisan  sa Lapulapu nasayran nga si Babatuan nasigpatan nila ni PO3 Esmael Zerna  ug PO2 Rey Zaen mga sakop sa Speed cop sa Traffic Division sa kapolisan  sa Lapulapu nga dunay kadudahang mga kargamento luwan sa usa ka  motorsiklo hinungdan sa ilang pagpahunong niini ug pagsita sa mga dala sa  suspetsado.

Atol sa paghiling niini nakita ang 10 ka wala pa mahuman nga whistle  bomb, mga pabilo,  sulfur ug  daghang mga gamit sa  paghimo og dinamita  alang sa pagbungkag sa mga bato. Lakip sa gisakmit sa kapolisan mao ang usa ka ZIM nga motorsiklong pula nga adunay plaka nga NP 5629 nga gisakyan  ni Babatuan karga ang maong mga ebidensiya.

Gumikan niini, gisumiter kini sa kapolisan sa dakbayan sa Lapulapu ngadto sa PNP Crime laboratory ang maong mga ebidensiya alang sa tukmang paghiling niini.

Apan gumikan kay milapas na ang reglamentary period sa pagpasaka  sa maong kaso si Babatuan gipabuhian kini ni   Insp. Rudy Amodia ug PO3  Dioscoro Arong gumikan kay walay migawas nga reklamante batok sa  suspetsado lakip na ang duha ka mga arresting officer nga si PO3 Zerna ug  PO2 Zaen hinungdan nga kagahapon sa buntag  pormal kini nga gibuhian    sa  kapolisan.