Mingla’ PNP pasidunggan

Hatagan og pasidungog ang kapulisan sa lungsod sa Minglanilla gumikan sa daling kasulbaran sa ‘chop-chop ladies’ nga gihulagway nga usa sa makapanimbawot balahibong krimen sa lalawigan karong tuiga.

Ang pasidunggan mao ang hepe sa Minglanilla Police Station nga si Sr. Insp. Romeo Santander ug tanang mga sakop niini tungod sa pagkasikop dayon sa tulo ka suspek sa pagpatay ug pagtagod-tagod sa mga lawas nila ni Eva Mae Peligro ug Gwendolyne Balasta niadtong nilabay’ng semana.

Si Sr. Supt. Carmelo Valmoria nagkanayon nga siya mismo ang motunol sa letter of commendation ngadto ni Santander ug mga sakop aron paghatag kanila og importansya sa maayong nahimo.

Moduso usab siya’g letter of recommendation ngadto na sa buhatan sa Police Regional Office aron hangyuong mahatagan og pasidungog ang kapolisan diha sa maong lungsod.

Matud pa ni Valmoria nasulbad dayon ni Santander ang krimen sulod lang sa pipila ka oras nga miresulta dayon sa pagkasikop sa mga responsable.

Kini bisan paman kun giputol-putol na ug gipanulod sa 13 ka garbage bags ang mga parte sa mga lawas sa biktima ug naanam og karekober sa mga imbestigador inabagan sa mga sakop usab sa Scene of the Crime Operation sa PNP Regional Crime Laboratory.

Usa sa daling kasulbaran mao ang gipakitang katakos ni Santander sa imbestigasyon nga dali niya nasumpay-sumpay ang sirkumstansya, ebidensya ug mga impormasyong nadawat mahitungod sa biktimang si Peligro ug ang mga suspek.

Gikatakda  usab nga ipaubos sa drug test ang mga suspetsado aron pagsuta usab kun tiggamitan ba kini sa ginadiling drugas.

Ilaha usab sutaon ang report kun tinuod ba nga adunay nakakita nga babayeng sakay sa taxi atol sa paglabay sa mga pinutol-putol nga lawas sa mga biktima, tungod kay ang usa sa mga suspek nga si Jean Antonette Medalle kusganong mihimakak nga apil siya pagpatay sanglit igo ra siyang gipapalimpyo sa duha sa crime scene.

Ang mga suspek wala pa mapasakai og kaso kagahapon og double murder sanglit wala pa makumpleto ang mga affidavits sa mga kabanay sa mga gipatay ug mga testigos batok nila Richard Gudelosao ug Joseph Rey Cellar alyas Jojo delos Santos ug Medalle.

Kagahapon sa hapon gikatakdang mobisita aron mopasalamat kang Valmoria ang mga kabanay sa biktima.