Kapolisan sa dakbayan sa Talisay ang naproblema og kabutangan sa mga sakyanan nga ilang na-impound sanglit gamay lang ang luna nga nahimutangan sa police station diha sa barangay Poblacion nga maoy ilang headquarters.
Diha sa atubangan sa police station lima ka mga motorsiklo ang naglaray karon nga na-impound ug kung dili kini malukat dayon sa mga tag-iya posibleng madugta sa uwan ug init ang maong mga sakyanan.
Ang hepe sa kapolisan sa dakbayan sa Talisay, Superintendent Romeo Perigo nagkanayon kagahapon nga ang maong mga motorsiklo expire na ang mga rehistro ug nasikop atol sa ilang pagpahigayon og check point.
Matud sa hepe nga kasagaran nga gamiton sa mga tulisan sa pagpanulis mga motorsiklo hinungdan nga higpit silang nagpahigayon og check point aron mapugngan ang mga kriminal sa pagbuhat og krimen.
Usahay mabantayan nga mokabat sa napulo ka motorsiklo nga na-impound ang maglaray diha sa atubangan sa police station ug gipanglukat usab kini sa mga tag-iya.
Gawas sa maong mga motorsiklo aduna pay mga sinakong uling nga nasakmit sa mga polis ang naa gitapok atubangan usab sa police station.
Ang maong mga motorsiklo ug uling ang nakahatag og sagabal dili lang sa panan-aw lakip na sa mga tawo nga dunay mga transaksiyon diha sa police station.
Diha sa kilid sa parke atbang sa police station gipahiluna ang mga dump truck nga gipangkargahan og mga balas ug nasakpan sa mga polis ug ang maong mga sakyanan ang mga na-impound usab.
Ang maong mga dump truck ang nakahatag usab og kahasol sa mga mosuroy sa lugar ilabi na sa mga mangaligo sa dagat tungod kay maglisod na sila og parada sa ilang mga sakyanan.
Ug kuyaw usab nga ang maong mga dump truck binuangan kung malipat ang mga polis nga nag-duty tungod kay dili man kini kanunay’ng malantaw kay nasalipdan man.