Gang war usa patay

Patay ang usa ka batan-ong giingong sakop sa usa ka gang human sila pamusila sa nagmotorsiklong gidudahang mga sakop usab sa gang kansang armas mikagar sa unang pagsuway apan nibalik ug namusil pag-usab kanila.

Ang insidente nahitabo diha sa sitio Bagong Buhay sa barangay Carreta kagahapon sa kaadlawon nga miresulta sa kamatayon ni Mark Tagalog Tobias, 16, usa ka tinun-an sa high school ug residente sa sitio Malinao sa samang barangay.

Samtang duha ka mga kaubanan niini ang nakalingkawas nga sila si Jess Brian Demecillo, 18, ug usa ka 17-anyos nga pulos niya mga silingan nga maoy una untang gipamusil.

Sa imbestigasyon nila ni SPO1 Rogelio Nedamo sa Homicide Section duha ka wala mailhing lalaking sakay og kolor pula nga motorsiklong may mga panyong kolor pula nga gipagimaw sa ilang mga bulsa ang namusil sa grupo.

Gikatahong nanag-inom niadtong tungura ang tulo uban sa duha nila ka mga higalang mga sakop sa gang nga sila si Jonard Ancajas ug Aldwin Ancajas dihang niabot ang mga suspek.

Ang mga mamumuno gikatahong nikanaog ug nangutana kanilang “Mga miyembro mo sa Crips?” una pa sila makatubag kalit nga gipusil sa backrider sila si Demecillo ug ang 17-anyos apan nikagar ang armas.

Diha-diha daling nisibat ang mga mamumuno  apan nibalik ug giusban sila og pamusil hinungdan sa pagkaigo sa biktima diha sa likod nga milapos ang bala diha sa tiyan ug patay na kini dihang nadala sa tambalanan.

Dali usab nga nangikyas padulong sa barangay Lorega-San Miguel ang mga mamumuno nga gigukod sa mga kabanay ni Tobias apan wala na sila maabti.