2 ka polis gipangsikop

Duha ka mga polis ang gipangsikop sa kauban nilang mga polis human malutsi og warrant of arrest tungod sa ilang tagsa-tagsa ka kaso.

Unang gisikop si PO2 Bombimo Enriquez sa Toledo Police Station tungod sa kasong homicide thru reckless imprudence human niya mapusili ang tawong armado nga iyang gi-alarma sa merkado sa Toledo.

Si PO2 Enriquez gidakop sa iyang mga kauban   nga sila si SPO1 Manuel Elijay ug PO1 Aldwin Pepito, apan nakagawas hinuon dayon human makapiyansa og P10 mil.

Nalutsan og warrant of arrest si PO2 Enriquez human gipasakaan og kaso ngadto sa sala ni MTCC Judge Ruben Altobar sa Toledo City human makapatay sa usa ka Rosalindo Pilapil niadtong 2006 sa dihang gitubag ang usa ka armed person alarm.

Si Pilapil naigo sa paa dapit sa iyang bugan, apan namatay hinuon.

Laing polis nga si PO3 Celso Cabrellas nga nadestino sa San Fernando Police Station nagtingkagol karon sa Sibonga Police Station human malutsi og warrant of arrest tungod sa kasong homicide.

Si PO3 Cabrellas maoy gipasanginlang mipatay sa usa ka Edgar Florida mga 14 na ka tuig ang nakalabay. Si RTC Judge Maximo Perez sa Argao ang miisyu sa warrant of arrest batok sa polis.

Sumala pa ni PO2 Niño Ibo sa Sibonga Police Station nga malinawon nga miuban si PO3 Cabrellas sa dihang giserbihan sa warrant of  arrest.

Sa iyang bahin, si PO3 Cabrellas nagkanayon nga makaduha na siya mi-apelar sa iyang kaso apan gibasura kini hangtod naabot sa Korte Suprema. Nagpaabot na lang siya sa order nga dad-on sa provincial jail o ngadto sa Muntinlupa.