Unom ka drayber ‘nanuyak’ sikop
Unom ka mga driver sa PUJ ang nasikop sa kapulisan human gipasanginlan nga nanuyak og mga sakyanan mga alas
Ang gipangbalhog sa karsel sa Pardo Police Station giila nga sila si Willy Marivelez, 33, Caesar Mangapis, 42, Rolando Yoson, 32, Rolando Cadivida, 28, Joel Aniñon, 28 pulos taga sitio Bogo sa samang barangay ug Ramil Jamili, 33, nga taga sitio View Hills sa mao gihapong barangay.
Ang unom pulos mga sakop sa Basak Babao United Drivers Association nga affiliated sa Nagkahiusang Driver sa Sugbu (NADSU) nga maoy milusad sa maong transport strike kagahapon agi’g panawagan pagbasura sa Oil Deregulation Law ug ang pagsunod sa minimum nga pletihan sama sa Manila nga P8.50.
Si SPO4 Edgardo Abangan sa Pardo Police Station nga gikahinabi sa Banat News miingon nga ang unom nasikop sa grupo ni SPO4 Sanrico Jolijoli human dunay mga motoristang mi-report nga sila gisuyakan sa mga suspek.
Dihang giadto sa mga polis, nakuha gikan kanila ang 15 ka mga numero tres nga lansang gipormang letrang “S” nga nagsilbeng spikes nga kung bisan unsaon og labay motindog gyud ang tinalinsang tumoy niini.
Si Marivelez nga gikahinabi sa Banat News nihimakak sa pasangil nga wa sila mohimo sa gipasangil kanila.
“Dili intawon na tinuod wala miy kalibutan ana. Naglingkod lang mi sa daplin sa gutter sa dalan uban sa mga driver pag-abot sa mga polis gisignit mi. Wa man gani mi kakita sa suyak. Kung naa pa naa untay na flat nga sakyanan,” sumala pang Marivelez.
Si Jean Suarez sa Karapatan Central Visayas mitug-an sa Banat News nga kasong illegal arrest, illegal detention, illegal search ug harassment ang ilang ipasaka sa kapulisan ngadto sa Visayas Ombudsman.
Samtang si Sr. Supt. Patrocinio Comendador nagkanayon nga kasong Grave Coercion ug paglapas sa Article 24 sa R.A. 436 ang ilang ipasaka batok sa unom.
“Nang-harass gyud sila, in fact naay gipangdakop kay nanuyak. We’ll have to teach them a lesson that they can stage a transport strike anytime as long as there’s no damages of properties or inflicting injuries to others,” asoy pang Comendador.
Gihimakak usab ni Comendador ang pasangil nga sila maoy mipakatap og tawong manuyo og samok sa strike sanglit supak na kini sa ilang trabaho. (Uban sa report ni Edwin Ian Melecio)
- Latest
- Trending
