Drayber namusil sa iyang amo gipangita

Gipangita sa kapolisan ang usa ka tawo kinsa misulay unta sa pagpusil patay sa iyang negosyanteng agalon nga usa ka Japanese national sa dalan A.S. Fortuna, Banilad, Mandaue City sa miaging gabii.

Ang gipangita mao si Eben Fabrigas, hingkod,  minyo nga taga Upper Sampanguita sa  Banilad ug  drayber sa langyaw nga si Yukuhiro Nakai, 50 anyos, kinsa maoy tag-iya sa Echikirichaya Restaurant diha sa maong dapit.

Si PO3 June Mondejar,  sa Presinto 4 sa Casuntingan Police Station miingon nga nasuko ang suspetsado dihang gipahibalo sa biktima nga gitangtang na kini sa iyang trabaho isip iyang family driver .Gumikan sa kasuko gipusil niini ang langyaw niyang amo ug maayo nalang kay wala maigo  ang naulahi.

Ang awto sa biktima nga gi-parking sa atubangan sa restaurant maoy gipahimungtan sa suspetsado pinaagi sa pagpusil niini sa makadaghang higayon dayong sibat pahilayo sa maong dapit.

Gipasakaan na sa biktima og kaso nga attempted homicide ug malicious mischief ang suspetsado kagahapon.