Independenteng grupong mokurihir sa sayop sa libro tukoron

Nanawagan si Cebu City Councilor Arsenio Pacaña sa Department of Education (Deped) nga motukod og “Task Force Cebu City” nga langkuban og mga eksperto sa specific subject.

Kini aron maoy mohiling ug mopahigayon og linaing review ug mokorihir sa mga libro sa mga tinun-an sa elementarya ug high school.

Kini tungod sa reports nga nagpabilin gihapon ang sayop sa mga librong giapod-apod ngadto sa mga tinun-an alang sa ilang mga leksyon.

Ang labaw’ng gikasubo ni Pacaña kay nagpabilin gihapon ang maong kontrobersiya taliwa sa pagkapagya niini niadtong miaging tuig.

“It is unfortunate that there are allegations and reports that textbooks have remain uncorrected despite the revelation in 2007 by experts,” sumala sa konsehal.

Lakip sa mga libro nga napagya sa miaging tuig nga dunay factual, conceptual ug grammatical errors mao ang English, Filipino, History ug Social Studies.

Nasayran nga duna nay mga ahensya nga gisangunan ang kagamhanan alang sa pagsusi ug pagkuriher sa nahisgutang mga sayop.

Kini sama sa Instructional Materials Council Secretariat (IMCS) ingon man ang National Book Development Board (NBDB).

Apan taliwa niini nitumaw gihapon ang kontrobersiya sa mga libro nga dunay daghang sayop ug giingong gikinahanglan gyud nga makorihian.

Tungod niini miingon si Pacaña nga angayan lang nga dunay independenteng grupo nga tahasang mohimo og linain nga pakisusi ug mokoriher sa kwestyonableng mga libro.