Nalumos kay giatake sa high blood

Nalumos patay ang usa ka tigulang nga lalake human atakiha  sa high blood samtang naligo  sa kadagatan sa barangay South Granada, lungsod sa Boljoon, niadtong Huwebes sa alas 12:00 sa udto.

Ang biktima giila sa kapolisan nga si Lucio Medalla Sesante, 68 anyos, retirado nga Postmaster  ug nagpuyo sa maong lugar.

Matod ni SPO3 Benjamen Geraldizo sa Boljoon Police Station nga nahinabi sa Banat News  nga ang biktima nananghid nga maligo sa dagat human mamutol og kahoy sa ilang yuta.

Apan paglabay sa pipila ka minutos mao nalay ilang nabalitaan nga  patay na kini ug naglutaw-lutaw na sa dagat ang iyang lawas.

Gidala  ang biktima sa Oslob District Hospital ug  gideklarar kini sa mga doctor nga dead on arrival (DOA).

Gituohan nga gi-atake sa high blood ang biktima nga maoy hinungdan sa kamatayon niini.