5 ka Briton gipangita

Lima ka mga Briton   nga  gidudahang mga pedophiles gipangita na karon sa mga sakop sa Bureau of Immigration and Deportation (BID 7) dinhi sa Sugbu.

Matud pa ni BID 7 regional director  Reynaldo Almadin human sila makadawat og impormasyon nga nia na sa Sugbu ang lima ka mga Briton dali niyang gipapangita sa iyang mga tawo ang maong mga langyaw.

Base sa talaan sa BID-Manila ang lima ka giila ni Almadin nga  mga British nationals  sila ni Kriss McCord, Barry Reymong Edwards, Robert Donaghv, Desmond Graham Kelly ug Paul Francis Gadd.

Kasagaran makita ang mga pedophiles sa daghang mga tawo nga nagtapoktapok sama sa mga beaches, malls ug sa mga plaza diin mangita kini sa ilang gustong ikakuyog nga mga bata.

Matud pa ni Almadin nga kasagaran sa modus  operandi sa maong mga langyaw ang pagdani  sa mga bata pinaagi sa materyal nga butang aron  kun kini ilang madala kuhaan kini nila og mga hulagway’ng hubo o molestiyahon dala ang pagkuha sa mga video footage niini ug ibaligya sa mga merkado sa gawas sa nasud.

Gumikan niini, giawhag ni Almadin ang  mga Sugbuanon sa pagtaho kanila kun ugaling ila kining makita ug masikop ang lima ka mga  pedophiles nga nakasulod dinhi sa Sugbu.

Sa pagkasikop sa maong mga langyaw imbestigahan kini og ipa-deport ngadto sa nasud nga ilang gigikanan.