Samdang sundalo gihataga'g medalya ni Lt. Gen. Inserto

Gihatagan og medalya ang nasamdang sundalo atol sa engkwentro tali sa mga rebeldeng New Peoples Army diha sa sitio Avocado sa barangay Talalak lungsod sa Sta. Catalina, Negros Oriental niadtong Mayo 27 sa hapon.

Si PFC Bertito Reyes, sakop sa 79th Infantry Battalion nga napusilan sa sniper diha sa tiyan ug naputlan og tinai gihatagan og Purple Heart Wounded Personnel Medal ni Central Command Commanding General Lt. Gen. Pedro Ike Inserto kagahapon diha sa iyang higdaanan sa Camp Lapu-Lapu Military Hospital

Si Reyes kabahin sa tropa sa 79th IB nga mi- reinforced sa mga tropa sa Army Scout Rangers nga nisulong sa kampo sa New Peoples Army diha sa nahisgutang lugar apan gikatahong dunay gibiling mga snipers ang mga rebelde aron pakgangon ang dugang pwersa nga mogukod atol sa ilang pag-eskapo.

Si Inserto sa pakighinabi sa mga tigbalita kagahapon mitug-an nga duna silay impormasyon nga naa sa maong kampo ang mga lider sa Central Visayas Regional Party Committee nga gikunsiderar nilang mga VIPs sa mga rebelde dinhi.

Sumala pang Inserto nga mga NPA regulars nga armado og tag-as nga kalibre sa armas ang gikaengkwentro sa iyang mga sakop ug determinadong mapugngan ang militar aron makaikyas ang ilang mga lider.

“We expect fierce fighting because they are protecting their VIPs…hopefully we may be able to catch up with them and give them a big fight and prevent them from transferring to other area,” sumala pang Inserto.

Matud pang Inserto nga ang mga sibilyan diha sa mga dapit nga naagian sa mga nangikyas nga mga rebelde mitug-an nga dunay mga estudyanteng kuyog sa mga rebelde.

Apan si Inserto nagkanayon wala pa sila masayod kung kumpirmado kini ug kung pila ka mga tinun-an ug kung asa nga tunghaan sila naggagikan apan dako ang iyang pagtuong posibleng sila mga militanteng tinun-an ug nagpahigayon og ‘emersions’ kabahin sa kinabuhi sa mga rebelde.

Samtang mipasalig si Inserto nga luwas ang maong mga tinun-an kung dili sila magdala og armas.

“If they carry firearms they will be considered enemies especially in the middle of firefight,” asoy pa niini.

Samtang giila usab ang napatay nga buddy ni Reyes nga si PFC Jessie Nolino sa maong engkwentro.

Matud pang Reyes siya maoy nauna og kaigo sa sniper apan niligid siya paubos ug gisunod usab og pusil si Nolino nga matud pa niya iyang suod nga higala.

“Masaya pero malungkot din kasi namatay yung isang kasamahan (Nolino) ko,” asoy pang Reyes dihang gipangayoan og pamahayag kabahin sa medalyang gihatag kaniya.

Si Inserto nagkanayon nga di siya magpanuko og hatag og pahalipay ug pasidungog sa iyang mga sakop nga makahimo og maayo apan sa samang paagi usab dili siya magpanuko pagsilot sa mga magpabadlong.