UV para sa Oslob

Nasagmuyo ang nga Oslobanon human naugdaw ang ilang 178 ka tuig nga simbahan duha ka buwan na ang milabay, apan wala makabsi'g paglaum nga ila kining mapabarog pagbalik.

Masaligon ug positibo ang mga molupyo sa Oslob tungod sa determinasyon sa ilang Kura Paroko nga si Rev. Fr. Valentino Gemelo nga mapatindog pag-usab ang nasunog nga simbahan.

Si Cebu Archbishop Cardinal Vidal, mihulma og duha ka ad hoc committee, usa sa Archdiocese nga gipangulohan ni Finance Officer Rev. Msgr. Joseph Tan ug ang laing usa gipangulohan sa presidente sa pastoral council sa Oslob nga si Vivencio Lagahid.

Ang maong komitiba tumong mao ang pagpangita og initiatives aron nga makapundo og igong salapi nga gamiton unya alang sa restoration kun mahuman na ang parallel study nga kasamtangang gipahigayon sa Oslob.

Ang midumala sa maong pagtuon mao si Fr. Carlo Aguilar uban sa iyang mga kaubanan.

Gibanabana nga sa sunod semana, matino na ang resulta sa tinuoray nga kahimtang sa mga nagtindog nga parte sa simbahan nga wala maapil sa sunog.

Nunot sa dakong panginahanglanon sa pagpatukod pag-usab sa naugdaw'ng simbahan sa Oslob, gipalihok ni Executive Vice-President sa University of the Visayas, Dr. Jose "Dodong" Gullas ug kapikas niini nga si Nena Gullas ang pagpahigayon og konsiyerto sa UV Chorale ug ang kitaon ihatag alang church restoration sa Oslob.

Kini agig pasalamat sa talento ug kaayohan sa mga miyembro sa chorale.

Pormal nga gilusad ang fund-raising project sa UV Chorale, a concert for a cause nga may temang "Bulawanong Dalit Alang sa Oslob" kagahapon atol sa press conference nga gipahigayon sa Archbishop's Palace.

Sa pagkakaron, dunay 1, 164,000 nga nahipos sa panudlanan sa Archdiocese segun sa report ni Archdiocesan Economic Officer Rev. Msgr. Joseph Tan ug sa counterpart niini, 843, 969.95 ang pondo sa parokya sa Oslob.

Maylabot sa gi-report ni Fr. Gemelo nga pondo sa parokya, mipahayag siya mahitungod sa kontrobersiya nga nakadawat siya'g kwarta gikan sa WBC Super Featherweight champ nga si Manny Pacquiao. "I will clarify this, I have never received even a single centavo from Manny Pacquiao. I've never received it personally. The truth is, I have received nothing," asoy pang Gemelo.

"Wa gyud tawn na, kaluoy sa Diyos. Kung matinuod man, salamat sa Diyos," pagklaro pa niini

Buot sa pari nga dili mahugawan ang iyang pangalan tungod kay tumong lamang niya mao ang pagpabarog pagbalik   sa simbahan sa Oslob.

Ang konsiyerto sa UV Chorale "Bulawanong Dalit Alang sa Oslob" ipahigayon karong umaabot Mayo 24 sa SM Cinema One.

Ang mga tickets nagkantidad og P150 sa balcony seats, P200 sa orchestra, para sa matinee show samtang P300 sa balcony ug P500 sa orchestra para sa gala show sa konsiyerto.