Nalumos sa lunangan

Usa ka mag-uuma ang nakit-ang patay na nga nagkulob sa lunangan sa kabaw sa bukirang bahin sa sitio Sampig barangay Mantalongon lungsod sa Dalaguete niadtong Huwebes sa alas 7:00 sa buntag.

Giila kining si Samuel Banugan, nagpuyo ra usab sa maong lugar.

Matod ni PO3 Dominor Ravanes sa Dalaguete Police Station dihang nahinabi sa Banat News usa ka Laorenciano Paracuilles, 39, silingan niini ang nakakita sa patay'ng lawas niini daplin sa dalan sa iyang pag-agi nianang pagkabuntag.

Matod ni PO3 Ravanes gidudahan nga nalumos kini dihang natagak sa lunangan sa kabaw tungod sa sobrang kahubog niini sa pagpauli nianang pagkagabii.

“Pista man gud sa Mantalongon adtong petsa 14 ug 15 namista siguro ni gikan, unya pag-uli nadakin-as kay danglog man adtong higayuna sigi og ulan ulan,nalumos siguro ni tungod sa subrang kahubog,” dugang asoy ni PO3 Ravanes.

Ang municipal health officer nga si Reynalda Compasibo sa Dalaguete maoy nipahigayun og autopsy sa patay'ng lawas sa biktima ug niingon nga walay foul play ang kamatayon niini ug gituohan nga ang pagkalumos maoy hinungdan s a kamatayun sa biktima.(Darrel Carumba)