Gitigbas patay ang usa ka 31-anyos nga lalaki sa iya ra usab nga paryente nga dugay na niyang gikaaway didto sa bukirang bahin sa barangay Libo, lungsod sa Sibonga, Cebu niadtong milabay’ng buntag.
Ang biktima giila sa kapolisan nga si Wennie Carsonete Reponte,31, ulitawo, nagpuyo sa nahisgutang lugar samtang ang suspek mao ra usab ang paryente niini nga giila nga si Jacinto Carsonete, 51, ulitawo, usa ka mag-uuma ug silingan ra sa biktima.
Matud ni SPO1 Ramuel Banugon sa Sibonga Police Station sa dihang nahinabi sa Banat News gikan mitambong og pista ang biktima ug buntag na kining mipauli.
Sa dayong abot sa biktima sa pinuy-anan niini gikasugat niya ang suspek nga paingon untang maghimo og uling.
Subay sa imbestigasyon sa kapolisan, gibato sa biktima ang suspek ug naigo sa ulo apan nakahigayon og kuha sa gidala nga sundang ang suspek ug gitigbas niini ang biktima sa makadaghang higayon hangtod nga natumba ug gitiwasan pa kini.
Gidali unta pagdala sa Vicente Sotto Memorial Medical Center ang biktima apan pagka alas 4:20 sa hapon nianang adlawa gideklarar kini sa mga doktor sa maong tambalanan nga patay na.
Dugang nahipos nga kasayuran sa gihimong imbestigasyon sa kapolisan ang biktima ug suspek nagsugod sa ilang panagbangi nga miresulta sa pagdinumtanay niadto pang milabay’ng Biyernes Santo. (Darrel A. Carumba)