Lungsod sa Oslob magsaulog sa Municipal Heritage Week

Saulogon sa lungsod sa Oslob ang labing unang Municipal Heritage Week sugod karong adlawa, Mayo 6 hangtod Mayo 12. Dugay na kining giplano ni Mayor Ronald Guaren ug misamot ang iyang kaikag mahitungod niini tungod sa pagkasunog sa simbahan sa lungsod di pa lang dugay.

Sa maong kasaulogan, gilantaw sa mayor nga masibot usab ang mga Oslobanon sa pag-atiman ug pagpreserbar sa mga karaang butang di lamang sa ilang palibot kun dili lakip na usab ang mga ginagmay'ng butang sa ila mismong panimalay.

Gipaabot usab ni Mayor Guaren nga maaghat ang mga Oslobanon nga ibutang sa umaabot nga museum ang ilang mga karaang kabtangan aron mamahimong dugang tourist attraction sa maong lungsod gawas sa mga karaang bantayan sa hari, kota, sementeryo, mga balay ug uban pa.

Atol sa opening ceremonies, gipaabot nga motambong si PB Member Agnes Magpale, chairperson sa Committee on Tourism and International Affairs, nga maoy morepresentar ni Gob. Gwen Garcia kinsa duna usay mahinungdanong kalihukan ugma.

Apil sa plano sa committee on heritage nga gipangulohan ni Mayor Guaren ang pag-restore sa kwartel, usa ka karaang edipisyo sukad pa sa panahon sa mga Katsila, aron mamahimong municipal museum.

Ang proyekto sa par-restore sa kwartel giaprobahan na sa Gobernador kinsa misaad og suporta alang sa maong proyekto. (PR)