Score board ipabutang sa mga presinto –– Valmoria

Aron dili matawag nga nagmika ug nagpaabot lang ang kapolisan sa kalungsoran, gimando ni Cebu Provincial Director Carmelo Valmoria ang pagbutang og mga score boards sa ilang mga police stations.

Ang maong mga score boards susama sa nagtala sa mga nahimong agi sa mga polis sa matag semana o ba kaha matag bulan nga naglambigit sa tanang mga Flagship Program sa Philippine National Police.

Matud pang Valmoria atol sa Tapok Tapok sa Kia diha sa dalan Gorordo Avenue niadtong Biyernes kini aron dili makaingon ang publiko nga nagmika ang ilang pulisya ug nagpaabot rang dunay mahitabo una pa sila molihok.

Gawas pa niini makahatag usab kini og ideya sa lokal nga kagamhanan sa kalungsoran aron makita nila ang kakulangon ug kung unsay ilang mahatag nga ayuda sa ilang mga polis batok sa kriminalidad.

Ang PNP dunay mga Flagship Program sa Oplan Tracker diin pangitaon ang mga tawong wanted ug may mga warrants of arrest; Oplan Sagip Sangyaman alang sa kinaiyahan; Oplan Paglalansag alang sa pagsakmit ug paggukod sa mga loosefirearms; Oplan Sandugo alang sa pakigsandurot sa publiko; Oplan Sang-ingat mga preparasyon alang sa mga okasyon ug aktibidades nga nagkinahanglan og seguridad; Oplan Sandigan mao kini ang mga kampanya kontra kriminalidad; Oplan Banat nga kampanya batok sa drogas ug duna pay ubang mga kampanya nga kabahin sa trabaho sa kapolisan.

Matud pang Valmoria dako kini og matampo sa pagtan-aw sa publiko sa mga polis diha sa ilang mga lugar tungod kay makita man ang ilang agi kon mga accomplishments sa nanglabay'ng mga adlaw ug makita usab dayon kung nianang mga nilabay'ng mga adlaw nagmika ra gyud sila.

Magdepende nalang unya sa mga hepe sa mga presinto kung sinemana ba ang ilang pagbutang sa ilang scores.