Dugang police allowance di ok

Dili na makahatag og mas taas pa sa P1,000 nga monthly incentive allowance ang dakbayan ngadto sa mga polis sa Cebu City Police Office sumala pa ni Mayor Tomas Osmeña.

Kini maoy tubag sa mayor kabahin sa suhestiyon ni Konsehal Agustus Pe nga padak-an pa ang kasamtangang allowance karon sa kapolisan ug ang paghatag unya kanila og balay'ng kapuy-an.

Matud pa sa mayor dunay sirkular ang Department of Budget and Management nga nag-limit sa mga Local Government Units paghatag og sobra pa sa P1,000 nga allowance sa mga polis.

Gikatahong kung patuyangan ra ang mga LGUs paghimo niini dili kalikayan nga mapugos usab ang ubang LGUs bisan og gamay lang og estado sa ekonomiya pagsunod niini ug maapektahan usab ang uban pang serbisyo para sa publiko.

Kabahin hinuon sa housing program alang sa mga sakop sa Cebu City Police Office sumala pa sa mayor iya na kini karong gipatun-an.

Ang CCPO dunay regular nga kapin 900 ka polis sa 1,200 niini karon ka mga sakop. Nasuta nga kadaghanan kanila walay kaugalingong mga balay ug nag-abang lang uban sa ilang mga pamilya sulod sa dugay nang panahon.

Atol sa presentasyon sa CCPO diha sa atubangan sa Konseho sa dakbayan nakapakita si Sr. Supt. Patrocinio Comendador og 45 porsiyentong pagkunhod sa crime rate sa dakbayan sulod sa duha ka tuig gikan sa 2006 hangtud karong tuiga.