Dili mohimo og pormal nga imbestigasyon ang Don Vicente Sotto Memorial Medical Center (DVSMMC) sa nigawas nga report batuk sa kawani sa record section nga gireklamong nanghagad og sex bugti sa pag-release sa live birth sa anak niini.
Ang reklamante nga naila sa pangalan nga si Ronalyn Caballes, 27 anyos, nagpa-blotter sa Fuente Police station niadtong nilabay'ng adlaw human siya gihagad og sex sa usa ka Jeffry Polancos, property custodian sa maong tambalanan bugti sa pag-release sa gipangayo niini nga live birth sa iyang bata nga gianak sa maong tambalanan.
Apan matod ni Eleodoro Nonoy Mongaya, tigpamaba sa DVSMMC dihang nahinabi sa mga tigbalita gipaabot pa nila ang reklamante nga moduso og pormal nga reklamo sa ilang buhatan aron makasugod dayun sila sa pormal nga imbestigasyon.
Gipadayag ni Mongaya nga andam usab nga mohatag og katin-awan ang management sa maong laing kontrobersya sa higayun nga dunay mopasaka og reklamo.
Wala hinoon modetalye si Mongaya kun unsa ang aksyon nga gihimo sa management may labot sa maong bag-ong reklamo nga nitumaw.