Nag-sex sa Plaza gisikop sa polis

Usa ka lalaki ug babaye ang gidakop sa mga sakop sa Waterfront Police Station human sila maaktuhing naghilawas diha sa usa ka ngitngit nga bahin sa Plaza Independencia nga gikunsiderar nga pampublikong dapit.

Ang gidakop mao ang usa ka 42 anyos nga lalaki nga taga barangay San Antonio ug kapares niining 22 anyos nga dalaga nga taga barangay Ermita.

Sumala pa sa report sa Waterfront police, ang duha nakit-an sa mga estambay ug mga nanuroy diha sa maong dapit nga naghilawas hinungdan ila kining gisumbong ngadto sa Waterfront police station dili layo sa nahitaboan.

Ang grupo nila ni SPO2 Rene Cerna sa miscellaneous team ug mga kaubanan daling miukoy sa duha ug kalit giiwagan og suga hinungdan sa pagkasikop nila sa akto nga naghilawas.

Sumala pa sa mga polis hubo na ug wala na bisan unsang sapot sa ubos ang duha maong ila kining gisikop og gidala sa ilang buhatan. Sa gihimong imbestigasyon ang lalaki gikatahong nangangkong uyab sila sa babaye samtang ang babaye giingong wala magkadimao ang tubag.

Ang duha pasakaan og kasong paglapas sa Article 200 sa Revised Penal Code kon Grave Scandal ug Offense Against Decency and Customs.

Si Supt. Pedrillo Villamor,Jr. mitug-an sa Banat News kagahapon nga daw dunay problema sa pangisip ang duha apan ila gihapon kining pasakaan og kaso.