Karong adlawa mao ang ika 66 ka tuig nga pagkapukan sa Bataan tungod kay nahitabo man kaniadtong Abril 9,1942 gitawag kini kaniadto og Bataan Day.
Karon, Araw ng Kagitingan kon Adlaw sa mga Bayani. Ang ubang kagisuonan moingon nga: nganong saulogon man nato kining pagkapukan sa Bataan, dungog ba ugod kanang pagkapukan?
Alang kanako dungog ang maong pagkapukan sa Bataan ug gani nahimo man kadtong pagkapukan sa tibuok nasud nga Pilipinhon.
Dungog kay huyang pa kaayo kitang pagkanasod komo gihuptan pa man kita sa Amerika nga maoy atong Inahang Nasud. Gibawi kita sa Amerika gikan sa mga Haponanon isip timaan nga kita ilang gimahal ug gipangga. Dili ba matawag ta nga ang atong nasud natumba apan wa mahapla, nahikalimtan apan wa isalikway? Busa angay’ng ipasigarbo ang atong pagkapukan.
Sama da ugod kini sa gihimo ni halangdong Mayor Tomas Osmeña ngadto kang Gobernador Gwen Garcia nga human sa pagkasunog sa simbahan ug kombento sa lungsod sa Oslob miabot na karon sa iyang panghunahuna nga modonar og “fire extinguisher” ngadto sa kagamhanan sa lalawigan sa Sugbu silbing usa niya ka pagpakauwaw sa gobernador.
Unya gipuno pa niya ang pag-ingon: dili sila makaatiman sa ilang kaugalingong mga tawo unya mohatag sila og lima ka milyon pesos sa tulunghaan sa Lahug?
Kining pagkasultiha ni Tomas, sa way pagtan-aw nga linibo ka mga tawo ang malipay diha sa barangay Lahug, siyudad sa Sugbu, ilabi na gayud sa mga ginikanan nga kadaghanan kanila nag-aguroy sa tumang kawad-on.
Unya mipuno pa gayud si Tomas sa pag-ingon: Kini akong gihimo aron mauwaw ang gobernador para mohatag og “fire truck” ngadto sa lungsod sa Oslob. Kining paghisgot nimo og way uwaw si Kongresista Pablo Garcia ug si Kongresista Pablo John Garcia nag-awhag nga mangayo ka og pasaylo sa imong pagpakauwaw sa Gobernador. Kun dili, mag-atubang ka og kiha nga libelo.