Gisalikway ni Cebu City Councilor Gerry Carillo ang resulta sa usa ka survey, nga giingong nisamot karon ang kalisod sa katawhang Pilipino.
Ang resulta sa Pulse Asia survey nagpakita, nga duha sa tulo ka mga Pilipino ang nipadayag og kadismaya sa ilang kahimtang itandi sa nangaging tulo ka tuig.
Kini nagpasabot nga 66% sa mga Pilipino ang nisamot karon og kalisod sa ilang kahimtang apan alang kang Carillo, mas nilambo karon ang kahimtang sa katawhan ilabi na sa mga Sugbuanon kung ekonomiya ang hisgutan.
“Our lives have improved a lot as compared to the past years but whether or not this will satisfy us, that is something else,” sumala sa konsehal. Gihimong sanglitanan ni Carillo niini, mao ang paghupot og nagkadaiyang mga butang sa halos tanang pinuy-anan partikular na sa mga appliances.
Ang konsehal nga maoy chairman sa Committee on Urban Planning and Development sa City Council nagtuo nga wala lang matagbaw ang mga tawo sa ila karong mga panginahanglan.
Kini ang hinungdan nga ang uban niangkon nga nagkalisod sa ilang pagpuyo tungod sa ilang gusto nga maangkon ang tanan nilang gipangandoy. “You know, people are asking for more, kinsa may dili gusto nga dili nimo maangkon ang tanan nimong gusto and I think that’s very understandable,” nagkanayon ang konsehal.
Apan sa nahisgutang survey 11% lang sa mga Pilipino ang giingong nilambo ang ekonomiya sa nasod ug 10% lang usab ang giingong natagbaw karon sa ilang kahimtang.
Kini sukwahi sa gipasigarbo ni presidente Gloria Macapagal Arroyo nga mas nilig-on karon ang ekonomiya sa nasod itandi sa nangaging katuigan.
Wala hinoon molalis si Carillo nga ubay-ubay gihapon sa mga Pilipino ang nag-ilaid karon sa tumang kalisod ilabi na nga ang Pilipinas nakasinati karon og krisis sa bugas, ug nagkamahal usab ang ubang nanag-unang palaliton.