Patay ang usa ka lalaki human dakdaki og bato human kini gitabangan og kulata sa tulo ka manghod sa sitio Cagudoy, Basak dakbayan sa Lapulapu sa miaging Domingo sa gabii.
Ang namatay mao si Adelino Pino, 33 ug ang tulo ka manghod nga suspetsado mao sila si Christopher Pino, Roberto Pino ug Restituto Pino nga pulos hingkod ang panuigon ug nagpuyo gihapon sa maong dapit.
Si PO3 William Humoc sa Homicide Section sa kapolisan sa maong dakbayan nga nahinabi sa Banat News miingon nga nag-inom ang managsoon ug dihang nangahubog na kalit lang mitumaw ang panaglalis.
Si Adelino nga maoy kamagulangan ang mipataliwala ug mibadlong sa mga igsuon apan di buot maminaw si Christopher.
Si Adelino wala na makapugong sa kaugalingon mipunit og kahoy ug gibunalan ang ulo ni Christopher nga maoy nakaingon sa pagkagisi sa ulo niini.
Gikasuko kini ni Roberto ug Restituto hinungdan nga ilang gitabangan og sukmag si Adelino kinsa napugos usab sa pagsukol pinaagi sa pagbunal og kahoy ngadto kanila.
Apan si Adelino way nahimo sa tulo dihang naigo sa nagpungasi nga kinumo hangtud nga wala makapanimbang ug natumba sa yuta.
Dihang nakita ni Christopher nga nahagba na sa yuta ang biktima dali kining mikuha og dakong bato ug gidakdakan ang ulo nga maoy nakaingon sa grabeng kadaut niini ug namatay.
Dali nga gitubag sa kapolisan ang alarma ug ilang nadakpan sila si Christopher ug Roberto kinsa pulos may gisi sa ulo apan si Restituto nga nakasibat ang padayon pa nga gipangita.