Mobiyahe sa Netherlands  ang mga opisyal sa CH

Gitakdang mobiyahe ngadto sa Haarlemmermeer Netherlands ang pipila ka mga opisyal sa dakbayan sa Sugbu karong sunod buwan. Ang Haarlemmermeer giingong maoy labing aktibo sa kapin sa napulo ka  sister city sa siyudad  ug daghan na og mga hinabang nga nahatag sa dakbayan.

Kini sama sa mga kahimanan nga gigamit karon sa Cebu City Medical Center ug  Emergency Rescue Unit Foundation.

Lakip sa mobisita sa nahisgutang nasud  mao sila si  Bise Mayor Michael Rama ug ang mga konsehal nga sila si Arsenio Pacaña, Augustus Pe Jr., Christopher Alix ug Edgardo Labella.

Tuyo sa maong mga opisyal nga maduaw ang mga sister  city  nga giingong giimplimintar didto sa Holland nga may kalabutan sa kalikupan ug uban pa.

Itunol usab ni Rama ug kaubanan ang award of recognition ngadto sa Haarlemmermeer nga gihatag atol sa ika-71 nga Charter Day Anniversary sa siyudad sa Sugbu sa miaging buwan.

Gawas niini, motambong usab ang mga opisyal sa dakbayan sa Sister City Anniversary sa duha ka lokal nga kagamhanan.

Gitakdang molarga paingon sa Netherlands sila si Rama ug kaubanan karong Abril 27 ug mobalik sa Sugbu unya pa sa Mayo 3.