Customs paguwardiyahan og police sa Semana Santa

Bag-ong  direktor sa Enforcement and Security Services  (ESS) sa Bureau of Customs mimando nga pabutangan og duty customs police atol sa Semana Santa.

Kini ang pamahayag ni ESS Director Ret. Gen. Nicasio Radovan atol sa iyang unang pagbisita sa buhatan sa ESS dinhi sa Port of  Cebu sa milabay'ng adlaw human kini bag-ong miasumer sa iyang katungdanan sa milabay'ng bulan hulip ni Ret. Gen. Nestorio Gualberto.

Matud pa ni ESS District Commander Capt. Alfonso Abbariao aron malikayan ang susamang panghitabo sa milabay'ng  katuigan nga daghan sa mga kargamento nga anaa sud sa Cebu International Port  (CIP) mawagtang o gipangawat atol sa maong kalihukan sa Semana Santa ug sa Pasko.

Gumikan niini si   Abbariao mihimo na og lakang sa pagbutang og mga duty police officer isip maoy magsilbeng “skeletal force” atol sa Semana Santa.

Kahinumduman nga sa milabay'ng mga tuig ang barkong M/V Great Faith ug uban pang mga kargamento  nawagtang sulod sa CIP diin pipila na ka mga opisyal ang nag-atubang  na og kaso nga hangtod karon wala pa makadawat sa ilang mga retirement benefits sa ilang serbisyo.