Hepe sa ‘Lacion PNP gipasanginlang nanion og armas

Hugot nga gipanghimakak sa hepe sa kapolisan sa lungsod sa Consolacion Inspector Leoncio Baliguat Jr. ang pasangil nga ilang gipanionan og armas ang mga sibilyan nga mitambong sa birthday party sa Barangay Lamac  sa maong lungsod niadtong Domingo sa gabii.

Giklaro niya nga lehitimo ang buy bust operation nga gihimo ug adunay tukmang koordinasyon sa Philippine Drug Enforcement Agency (PDEA)-7 ug maoy ilang target ang duha ka suspetsado nga  sila si Robert Arnold Agustin ug Clifford Quiapo.

Dugang pa niya nga si Quiapo nga ilang nadakpan ang nasakmitan og 47 ka linikit nga marijuana  ug unom usab ka linikit nga marijuana ang ilang nasakmit gikan kang Agustin.

Matud pa ni Inspector Baliguat nga pareha og nag-people power ang mga tawo ug gibabagan sila dihang ilang gidakop ang suspetsado nga si Agustin hinungdan nga nakaikyas hinoon kini.

Si Quiapo maoy ilang nadakpan ug ilang giapil pagdala ang usa ka Carlito Cuyos nga gibuhian usab nila human sa ilang pagsukitsukit niini.

Si Quiapo ang natanggong karon sa detention cell ug gipasakaan og kaso nga kalapasan sa Republic Act 9165 kon “Comprehensive Dangerous Drug Act of 2002” lakip si Agustin ang gipasakaan usab og samang kaso bisan og nakaikyas kini.

Gitataw ni Inspector Baliguat nga igo lamang silang misanong sa hangyo sa mga opisyal sa barangay sa maong dapit kinsa gibati na og kabalaka sa naghitak nga pagpayuhot og ilegal nga drugas.

Sa nasayran sa Banat News nga si PO2 Cecilio Miñoza maoy kuyog ni Inspector Baliguat nga nagpahigayon og buy bust operation sa maong dapit kinsa lakip usab sa gireklamo og pagpanion sa armas.