Sikyu gitulis ug gipatay

Patay ang usa ka off-duty nga security guard kinsa giingong gitulis ug gipusil sa duha ka wala hiilhing lalaki nga nagtaptap og itom nga panapton samtang ang biktima nag-text sa cellphone sa atubangan sa establisamento nga iyang gialagaran.

Ang pagpanulis nahitabo alas 3 pasado ang takna sa kaadlawon sa atubangan sa gitrabahoan niining dakong mall diha sa eskina sa UN Avenue  ug Sotero B.  Cabahug sa barangay Ibabao Estancia, dakbayan sa Mandaue.

Si P03 Herbert Pelayo sa Presinto sa Centro Police Station miila sa namatay nga mao si Roel Ragudo, 24, minyo nga taga dalan Sotero B. Cabahug sa barangay Ibabao Estancia sa maong dakbayan apan lumad nga taga Bantayan Island.

Usa ka 17 anyos nga dalagita nga lumad nga taga lungsod sa Ginatilan ug giingong hinigugma sa biktima ang giingong kauban niini dihang nahitabo ang pagpanulis.

Subay sa gitug-an sa dalagita ngadto sa kapolisan kasamtangang nag-text si Ragudo sa iyang cellphone dihang giduol sa duha ka wala mailhing lalaki ug mition og wala matinong kalibre sa armas dayong deklarar og tulis.

Gikatahong gikuha sa mga tulisan ang cellphone sa biktima ug gikapkapan pa ang bulsa niini, apan ang nakapahibulong sa mga polis mao ang pagpusil sa tulisan sa dughan sa biktima human kini rekisaha.

Matud pa sa karatol sa mga gikatahapan nahabilin pa nila ang cellphone nga Nokia 3315 sa biktima, samtang napalgan usab diha sa crime scene ang lima ka bala sa kalibre .38 ug usa ka basiyo niini, wala hinuon matino kung bala ba kini gikan sa biktima o sa armas sa mga tulisan.

Ang mga tulisan gikatahong daling miikyas palayo sa dapit.

Apan ang asawa ni Ragudo nga si Jessa nga gikahinabi sa Banat News sa iyang telepono di motuong gitulis ang iyang bana kundili gituyo gyud nga kini masulod sa laang aron patyon.

Matud pa niini dugay na siyang nakahibalo kabahin sa relasyon sa iyang bana ug sa 17-anyos nga dalagita ug gikatahong gibaharan na usab ang iyang bana sa mga partidos sa maong babaye tungod kay minyo kini.

Sumala pang Jessa, base sa gibutyag kaniya sa mga kaubang gwardiya sa iyang bana nga off-duty na unta kini niadtong tungura. Sayo pa nianang gabhiuna gikatahong dunay ni-text sa iyang bana nga buot makigkita diha sa gawas sa ilang giabangang boardinghouse, gikatahong mao kini ang 17-anyos nga dalagita.

Apan giingong wala mopakita ang maong babaye tungod kay dunay kauban ni Ragudo nga nikuyog diha sa gawas ug maoy nagsige og tambag nga dili nalang pagawson.

Nianang pagkakaadlawon nakadawat kini pag-usab og text ug anha sila magkita sa atbang sa maong mall diin mahitabo ang pagpatay.

Gihimakak usab ni Jessa nga dunay cellphone ang iyang bana sanglit ang narekober nga 3315 cellphone gidudahan niyang iya sa igsuong babaye sa karelasyon sa iyang bana nga gipahulam ngadto sa naulahi. (Edwin Ian Melecio ug report ni Romeo T. Limpangog)