Problema sa basura gibasol ngadto sa brgy. officials

Gibasol ni Cebu City Councilor Edwin Jagmoc ang mga opisyal sa kabarangayan tungod sa kapakyas  pagkuha og  ayuda gikan sa kagamhanan sa dakbayan pagbaton og mga trak sa basura, fuel allocation sa mga sakyanan sa barangay ug uban pang tabang gikan sa siyudad.

Ang mga barangay Tinago, Punta Princesa, Lorega San Miguel ingon man ang Cogon-Pardo ug Poblacion-Pardo maoy gitumbok nga wala mangayo sa City Hall.

Ang konsehal nga maoy chairman sa Committee on Public Services sa City Council miingon nga ang panaghiusa lang sa mga opisyal sa barangay ang gikinahanglan niini.

“Sa una man gud, wala man mangayo ang mga kapitan sa maong mga barangay ana sa siyudad unya ang uban niuli pa sa ilang garbage truck,” sumala ni Jagmoc.

Gipasalig hinuon sa konsehal ang pagtabang sa mga barangay sa ilang mga gikinahanglan kung magkahiusa lang ang mga opisyal niini sa pagpangayo sa City Hall.

“Magkahiusa gani sila, wala gyud nay problema, pero kung dili sila united naay uban nga oposisyon, maglibog man ta kay naay muhangyo, naa say mobabag, so, ang akong tambag ana nila nga magsabot-sabot sila aron magkahiusa sa paghangyo ngadto sa mayor kay kita usab nga motabang makahibawo ta kung unsaon nato pagtabang,”dugang pamahayag ni Jagmoc.

Sa pikas bahin giangkon sa konsehal nga kuwang pa ang gihimong kooperasyon sa kabarangayan labot sa pag-compost sa mga basura.

Gitataw ni Jagmoc nga sa 80 ka mga barangay sa dakbayan pipila lang niini ang nihimo sa pag-compost sa ilang mga basura.

Partikular nga gihisgutan sa konsehal mao ang barangay Luz, Hipodromo ug Calamba nga giingong aktibo sa maong gimbuhaton.

Tungod niini miingon si Jagmoc nga atol sa ilang tigom sa Solid Waste Management Board iyang iduso nga hingusgan sa City Agriculture Office ang pagdasig sa composting.

“Ang ila man gong buhatan maoy dunay expertise sa composting, so, kana sila ang akong awhagon nga maoy mo-train sa mga mulopyo sa kabarangayan,”dugang pamahayag sa konsehal.