Granada mibuto; 3 angol

Nangaangol ang tulo ka mga tawo human sila labaya og hand grenade sa ilang gikainom sa dihang nitumaw ang panaglalis kagahapon sa kaadlawon diha sa N. Bacalso Avenue ning dakbayan sa Sugbu.

Maayo na lang gani kay nakabantay nang daan ug nakatago apan nakaangkon gihapon sila og samad sa kalawasan human maigo sa mga shrapnels sila si Mark Jason Reales, 27, Leonardo Tagonon, 19, ug Randrosh Juntilla, 19, ang tulo parehong nagpuyo sa barangay Sambag I.

Samtang ang gitumbok nga milabay kanila og granada giila sa kapolisan nga mao si Michael Gilwa, 28, usa ka construction worker, lumad nga taga Cantilla, Negros Occidental ug temporaryong nagpuyo sa naasoy’ng barangay.

Base sa pasiunang imbestigasyon sa Homicide Section nga nag-inom ang mga biktima ug suspek diha sa nahisgutang lugar ug gikatahong nahubog si Gilwa hangtod mitumaw ang  panaglalis.

Apan miuli  si Gilwa ug wala magdugay mibalik nga nagdala na kini og granada dayon gibutang sa lamesa.

Si Reales giingong  maoy mipugong ug gikuptan ang bukton sa suspek aron dili tangtangon ang pin niini sa maong granada apan nanghagad hinuon kini og sinukmagay.

Ang tulo wala misukol sa suspek og sinumbagay hinungdan nga milakaw na lang kini, pipila lang ang distansya kalit lang gipaligid ang granada nga wala nay pin ug mibuto.

Si Reales nakaangkon og  samad sa duha ka kamot, samtang sa dapi-dapi ang kang Tagonon ug tuong kamot ug pulso ang nahiaguman usab ni Juntilla.

Gidali pagdala ang mga biktima sa Cebu City Medical Center samtang ang suspek dali usab nga misibat.

Si Insp. Mario Monilar, hepe sa Homicide Section sa Cebu City Police Office nagkanayon nga tulo ka counts sa attempted murder ang ilang giandam nga kaso batok sa suspek.

Kagahapon sa hapon si Monilar nagpaabot  sa medical certificate sa mga biktima aron pormal nilang masang-at ang kaso sa piskaliya.