Gihagit ni Supt. Juanito Enguerra, hepe sa Provincial Intelligence Branch (PIB) ang nangeskapong priso nga mopahigayon og re-enactment sa nahitabong pag-eskapo nila niadtong Huwebes sa gabii sulod sa detention cell sa Provincial Headquarters.
“Aron mahibaw-an kinsay nagsulti sa tinuod, ang ilang bersyon sa piniriso, dili version sa polis (taga RID),” asoy pang Enguerra sa mga tigbalita.
Upat ka mga bug-at nga rason ni Enguerra, nga nagdudang wala gyud ipasulod sa detention cell ang walo ka mga piniriso sa duha ka mga polis nga sakop sa Regional Intelligence Division (RID) niadtong higayona.
Sa nasayran niadtong Huwebes sa gabii walo ka dinakpan sa Regional Intelligence Division sa PRO-7 ang gibilin sa duha ka mga polis nga si PO3 Danilo Lopez ug laing usa ka kauban diha sa prisohan sa CPPO apan gikatahong nakaeskapo.
Apan sa walo, usa nalang ang pabiling gawasnon human ang pito niini nisurender pagbalik sa kapolisan pagka sunod adlaw.
Matud pang Enguerra nga duna untay mga timailhan sa pag-eskapo sa walo tungod kay nakita niini nga limpyo ang sulod ug bisan gamay wala gyud magkalapok ang sulod sa maong detention cell.
Kumpleto ang padlock, walay mga nakitang markings nga unta gabok naman ang container van nga gihimong prisohan.
Matud ni Enguerra ang motibo sa duha ka mga polis nga sila si PO3 Danilo Loper ug laing kauban niini paglikay lang sa ilang tulubagon.
Nagtuo si Enguerra nga diha sa ilang mga kamot nakaeskapo ang walo ka mga piniriso niadtong gabii sa Huwebes ug wala nieskapo sa detention cell sa Provincial Headquarters.
“We stand sa pamahayag sa akong mga sakop nga wa masulod sa prisuhan ang walo, nisalig ko nila ug ingon man makita nato sa ebidensya, lig-on ang physical evidence kay di mamakak, pero ang tawo puwede mamakak,” sumala pang Enguerra.
Gihagit usab ni Enguerra nga iyang tagaan og partida ang mga piniriso kung giunsa nila paggawas sa prisohan.
Gani miingon siya nga hatagan niya og duha ka adlaw ug gamit nga bara de kabra aron masuta nga wala bay marking’s ug ingon man madali-dali ba nila paggawas ang maong prisohan.